Die taakspan FLAM bestaan uit ‘n groep aanbiddingsleiers (sommiges is
predikante) wat op ‘n gereelde basis nuwe musiek aan bepaalde
kriteria meet en indien daar aan hierdie standaarde voldoen word, word
die musiek opgeneem in die korpus van FLAM-liedere wat via die internet
deur gemeentes afgelaai kan word.

Al die groot verspreiders van geestelike musiek, soos Maranatha en Merchant, 
werk saam met FLAM en ook hierdie liedere word as FLAM-liedere versprei
indien dit aan die kriteria voldoen.

’N KORT GESKIEDENIS 2009

Die opdrag van die Algemene Sinode

In 2002, nadat die Liedboek die kerk in SA getref het, was daar ‘n beduidende groot groep lidmate wat aangetoon het dat die Liedboek té min, té laat was.  Die grootste klagte was dat daar nie genoeg kontemporêre (‘band’) musiek was nie en dat die jeug (wat die kinders en veral die hoërskool- en naskoolse jongmense insluit) weer eens aan die kortste end getrek het.

By die daaropvolgende Algemene Sinode (AS) van die Ned Geref Kerk het die AS toe ‘n taakspan in die lewe geroep wat ‘n meganisme moes skep waardeur die kerk nuwe, Afrikaanse kontemporêre kerkmusiek op ‘n voortdurende basis kon invoer.
Aanvanklik is die taakspan saamgestel uit lede van die (nou ontbinde) AJK se subkommissie vir musiekbediening, asook die (nou ontbinde) AKE (Eredienskommissie).  Die idee was dus van die begin af dat dit ‘n kommissie moes wees wat nuwe musiek vir gebruik in die eredienste moes skep.

Eerste struikelblokke

Die eerste struikelblokke waarteen FLAM te staan gekom het, was finansieel.  FLAM wou graag musiek uitgee, maar die nodige finansies het ontbreek.  Deur die bemiddeling van Dr Braam Hanekom, wat in daardie stadium die voorsitter van ADGO was, is Maranatha Gospel Music Publishers as vennoot betrek.  Maranatha was vanaf 2004 tot 2008 nou betrokke by FLAM en het twee FLAM CD’s in die tyd uitgebring.  

Alhoewel FLAM en MAR Gospel Music Publishers nog steeds saamwerk, het die amptelike vennootskap aan die einde van 2008 aan 'n einde gekom, omdat die kommissie besluit het om 'n eie musiekuitgewer, Flam Musiek Uitgewers, te stig.

Webtuiste

Dit was van die begin af duidelik dat ‘n harde kopie met bladmusiek onbetaalbaar duur sou wees.  Die besluit is dus geneem dat die musiek van die internet afgelaai moet kan word.

Hiervoor het ons die hulp gevra en samewerking gekry van die vriendelike personeel van CCLI.  Gemeentes wat oor die nodige lisensies beskik kon gratis die musiek aflaai – wat tot in Junie 2007 op die webtuiste van die AJK gehuisves is.
Sedert Junie 2007 het FLAM hul eie webblad (www.flam.co.za).  

	Ben Klut
	Voorsitter, Kopiereg en FLAM Gemeentesang
	Ben is studenteleraar by die Universiteit van Johannesburg, in die NG Kerk Melville-Kruisgemeente. Hy speel kitaar.
	Neil Büchner
	Onder-voorsitter, Kersflam, Webtuiste en Bemarking
	Neil is kreatiwiteitsbestuurder van die NG Kerk Wellington (Moedergemeente). Hy is ‘n gospelkunstenaar met ‘n ATKV-lier toekenning agter sy naam vir sy debuut CD, ELEMENT
	Louis Dressel
	Skriba
	Oom Louis is kamstig afgetree, maar maak te lekker musiek saam met FLAM. Hy het afgetree as die Predikant in Sinodale Diens (met opdrag: Jeug) en het meegewerk aan die rooi en groen Jeugsangbundels. Hy was ook op die eindredaksie van die Kitaar- begeleiersboek van die Liedboek.
	Johan Engelbrecht
	Notering en Flammikidz
	Johan is predikant in Hartenbos. Hy is musiekleier (akoestiese kitaar), maar tree gereeld by ekumeniese eredienste as violis op.
	Johan Steenkamp
	Kruisfuur (Musiek vir die jeug – veral tieners)
	Johan is predikant by die NG Kerk Jeffreysbaai (Jeugleraar). Hy is ‘n kitaarspeler (akoesties en elektries). Sy band ‘OudioAltaar’ het in 2008 hul eerste CD uitgereik.
	Marcus Marinus
	Kruisfuur (Musiek vir die jeug – veral tieners), IT en Webtuiste
	Marcus is predikant in Krugersdorp-Oos. Hy is ‘n baskitaarspeler en was lid van die band ‘AudioAltaar’.
	Irenee Heyns
	Kruisfuur & Kersflam
	Irenee is predikant by die NG Kerk Kenridge. Hy is ‘n musiekleier (akoestiese kitaar)
	Carli Lessing
	FLAM Gemeentesang
	Carli is ’n musiekleier en skryf gereeld op www.wins.co.za – ’n webtuiste wat gaan oor lof & aanbidding en om mense daarmee te help. Sy het ’n pragtige debuut album, VEEL MEER.
	Faani Engelbrecht
	Bestuurder: FLAM Uitgewers
	Faani is predikant by die NG Kerk Goodwoodpark. Hy is self ‘n musiekleier (akoestiese kitaar) en lid van die band, Vonkprop. Hy was lid van die eindredaksie van die Kitaarbegeleiersboek.
	Izelle Claassen
	FLAM Gemeentesang
	Izelle is 'n fantastiese musikant (viool) en tree gereeld op saam met kunstenaars soos Louis Brittz.